عمل الدعوة للحصول علي التاشيرة

السفر
23
0
sample-ad

هنتكلم دلوقتي عن الدعوة من مواطن تركي لمواطن مصري غلبان , عشان كلام كتير اتقال في موضوع الدعوة , فعايز حضراتكم يكون معاكم التفاصيل كاملة عشان محدش يقع ضحية اي نصب من هنا او هناك

اولا عايزين نعرف ان فيه نوعين من الدعوة , فيه الدعوة اللي بتتعمل باللغة التركي عشان تروح للسفارة التركية في القاهرة , وديه عشان تاخد بيها تاشيرة زيارة مش سياحة

فيه نوع تاني اللي هو بيتم ترجمته وتصديقة وديه عشان التصريح الأمني
==========================

النوع الاول بيتم كالتالي :

ان اي مواطن تركي يروح علي اي فرع للنوتير ( اللي هو الشهر العقاري في تركيا ) ويقول عايز اعمل دعوة لمواطن مصري , ويكون معاه بيانات المواطن المصري وهي :
اسمه واسم الجد
اسم الام
رقم جواز السفر
تاريخ الميلاد
العنوان

وكل البيانات ديه موجودة في صورة جواز السفر ما عدا اسم الام

وعشان تعرف اقرب مكان للنوتير ليك , ده لينك كل فروع النوتير في تركيا

http://bit.ly/1UFqrY6

وبيعملها في 10 دقايق وتكون جاهزة

طب الموضوع ده بيتكلف قد ايه ؟

التكلفة الرسمية للنوتير هي 40 ليرة , زائد ان المواطن التركي ممكن ياخد منك فلوس عشان هييجي معاك , انا اعرف واحد اخد مني 30 ليرة لما عملت دعوة لزميلي في مصر , يعني تكلفتها كلها علي بعض 70 او 80 ليرة حسب التركي اللي هييجي معاك هياخد كام , و ممكن مياخدش منك حاجة لو بيحبك فتدفع بس 40 ليرة

كدة الدعوة جاهزة وهي شكلها زي الصورة اللي علي اليمين , حضرتك تبعتها بالطرد او مع حد مسافر لمصر , عشان يروح بيها السفارة وياخد بيها تاشيرة زيارة , وديه خاصة بالسفارة التركية في مصر وملهاش اي علاقة بالمجمع او التصريح الأمني

بس فيه احتمال ان لو معاه الدعوة ميعرفش ياخد التاشيرة , يعني الدعوة مش تاكيد 100 % انه هياخد التاشيرة

كمان سمعت ان لو مصري معاه اقامة في تركيا ممكن يعمل دعوة بس مش عارف مدي صحة الكلام ده

==================================

ايه بقي النوع التاني ؟

النوع التاني مش حاجة جديدة , لكن هي ترجمة وتصديق لنفس الدعوة اللي انت عملتها من شوية , وديه مش للسفارة , السفارة مش هتعمل حاجة بيها , لكن ديه للمجمع عشان الظابط يشوفها فيتاكد ان فعلا انت رايح زيارة

طب ديه بتتعمل ازاي ؟

اولا تمسك نفس الدعوة اللي انت عملتها من شوية , وتترجمها من اي مترجم معتمد , اعرف واحد في يوسف باشا رخيص الي حد ما قدام محطة ترام يوسف باشا علي طول وفوق شاورما انس , وده مكانه التقريبي

http://bit.ly/1To9gsC

فاصل معاه , وممكن يترجمهالك ب 30 ليرة مثلا , وهيديلك نسختين مختومين منها

بعد ما تترجم تطلع علي النوتير التابع للمترجم , خد بالك في الدعوة الاولي تروح لاي نوتير , لكن مع الترجمة لازم تروح للنوتير التابع ليه , اسئل المترجم علي النوتير التابع هيقولك مكانه , النوتير بياخد في حدود 50 او 60 ليرة تقريبا

بعد ما تخلص النوتير تاخد بعضك وتروح علي (والي اسطنبول) عشان تعملها تصديق , وده مكانه

http://bit.ly/1eJu7ag

وعشان تروحه , اركب الترام من يوسف باشا 6 محطات , وانزل محطة جلهانة , ولما تنزل قول “اسطنبول فاليلي” هيوقولك اهو , لما تدخل قول “تصديك” تصدقها وانت واقف ببلاش من غير فلوس

بعدها اجري بسرعة روح علي القنصلية المصرية , اركب الترام تاني من جلهانة وانزل كاباتاش الاخر , وخد الباص اللي بيروح بيبيك , علي باب السفارة قول عايز اعمل تصديق , هتدخل , يخلص التصديق علي طول و ب 65 ليرة , بس متروحش السفارة بعد الساعة 2 عشان غالبا مش هتلحق

وده مكان السفارة
http://bit.ly/1SbbXeC

وده ازاي تروحها
http://on.fb.me/1FuEiKe

بس يا سيدي , الف مبروك كدة خلصت الدعوة , وشكلها زي الصورة علي الشمال , ابعتها مصر وديه مخصصة للمجمع عشان تقدر تجيب التصريح الأمني , وبرضه نأكد تاني ان وجود الدعوة مش ضمان أكيد انك هتاخد التصريح , ممكن يحصل تعنت وده وارد

كمان غالبا لو واحدة مسافرة لوحدها من غير ( اب – اخ – زوج ) مش هتاخد التصريح حتي لو معاها الدعوة , باستثناء طبعا لو تواصلت مع حد من اللي بيخلص الامور جوة

كدة يبقي التكاليف كلها كالتالي :

– عمل الدعوة من النوتير : 40 ليرة
– اجر التركي : حسب الاتفاق , ممكن 30 او 40 ليرة

ده لو هتعمل دعوة للسفارة التركية عشان التاشيرة , ولو هتعمل الترجمة والتصديق عشان المجمع يزيد عليهم

– الترجمة : 30 ليرة فما فوق
– النوتير : 50 ليرة فما فوق
– التصديق من الوالي : ببلاش
– التصديق من السفارة : 65 ليرة

بنقول الاسعارديه عشان الناس تعرف هتدفع قد ايه , ولو فيه مكتب هيعملها تبقي عارف السعر الأصلي للحاجات ديه

وربنا يوفقكم جميعا ان شاء الله

تعليقات الفيسبوك

تعليقات الموقع

اضف تعليق