خبراتى فى الحصول على تاشيرة تركيا

السفر
14
0
sample-ad

احد الاخوة كاتب تجربته من الحصول علي فيزا تركيا من قريب
=========================================

انا لسه مستلم فيزا تركيا النهارده و عايز افيد الناس بالجديد اللي بيحصل في السفاره .
اولا ياريت لو حد ينسخ كلامي ده علشان انا فاتح الفيسبوك مخصوص علشان اكتبه و هقفل الفيسبوك تاني ..
المهم بقي اولا حجز الميعاد بياخد شهر او اكتر ، في ناس بتروح شركات السياحه اللي بتبيع مواعيد بفلوس كتير ( حوالي ٥٠٠ جنيه ) لو شكوا انك حاجز كده بتاخد رفض .
الجديد بقي ان بعد ما الموظف بيقبل الورق في احتمال للرفض و للاسف معظم الناس بتترفض و مش عارف السبب ، بس نسبه اللي اترفضوا في ال٣ اسابيع اللي رحت فيهم السفاره اكبر بكتير اوي من اللي بياخدوا الفيزا .
اولا مرحله الابلكيشتن لازم كل البيانات تكون مليانه و مفيش ولا خانه فاضيه ، يعني اسم الاب و الام و عنوان و ايمال و تليفون الشغل يكونوا مكتوبين علشان يرضى ياخد منك الورق اصلا و رجعني علشان السبب ده و قعدت ٣٥ يوم علشان الاقي ميعاد .
اي ورق ناقص مبيستلمش و كمان لازم تأمين ٣ شهور ، اهم حاجه بيسألوا عليها التأمين . انا كنت عامل تأمين اسبوع و الموظف استلم مني الورق بس بعد ما جاتلي الموافقه مرضيوش يسلموني الباسبور غير لما اعمل تأمين ٣ شهور ( و طلبوا من بعض الناس ٤ شهور ) .
التسليم بقي يوم الاثنين و الخميس فقط من ٣ ل ٤ عصرل و كنت كل ما اروح يقولولي استنى بره و بعد ما استني و بعديها يقولي تعالي الاسبوع اللي جاي لحد ما طلبوا موضوع التأمين و فعلا سلمتهلهم و سلموني الفيزا بس طبعا بعد ما خلوني استنى لحد الساعه ٥ و ادوهاني ٣ شهور علي نفس مواعيد التأمين اللي عملته اللي هو ابتدى اصلا.
السفاره بقت زحمه اوي اوي و الموضوع بقي رخم خصوصا موضوع ان بقي في رفض لناس كتير بعد تسليم الورق و طبعا مبيرجعوش ال ٦٠ دولار و بتمضي علي ورقه بالكلام ده .
مبيقبلش جنيه مصري لاي سبب و لو مفيش دولار بيقولك احجز معاد من اول و جديد .
انا دي اول فيزا اقدم عليها و اتقبل و كان معايا ورقي كامل و كشف حساب في حوالي ٣٥ الف بس كان خمس ورقات و فيه عمليات سحب و ايداع كتير .
بكرر تاني علشان الناس متتصدمش زيي قصاد الموظف لما تلاقى موضوع الرفض ، و ياريت لو حد اخد رفض يفيدنا و يقولنا السبب .

تعليقات الفيسبوك

اضف تعليق